ፖሊሲ “ሕርሻ ዝመርሖ ኢንዱስትሪያላዊ ምዕባለ” ኣብ ትግራይ ሰሪሑ ዶ? 

ንቐፃሊ”ከ ክሰርሕ ድዩ? ብገብረስላሰ ኣርኣያ፣ 

2ይ ክፋል 

ሓፈሻዊ  ውፅኢት  ናይዚ  ኹሉ  ፃዕሪ  ኣበይ  ኣብፂሑና  እንተይልና  ግና 

ከምቲ ልዕል ኢሉ ዝተጠቐሰ ሕርሻና ይትረፍ’ዶ ኢንዱስትሪ ዝመርሕ ፍርያት 

ከምፅእ  እኹል  ቀለብ  ‘ውን  ንምፍራይ  ኣይከኣለን።  ህዝብና  ንርእሱ  ኣብታ 

ዘይብሉ  ዓቕሚ  ምስ  ኣዝዩ  ዝተጎድአ  ተፈጥሮ  ክቃለስ  ርብዒ  ዘመን  ሓሊፉ። 

ሎሚ’ውን ግን ኣብ ናይ እኽሊ ሓገዝ ይነብር ኣሎ። ነዚ’ውን እዩ እዚ ፖሊሲ 

ብደምቢ  ተፈቲሹ  ከከም  ክልሉ  ትሕዝቶ  ምትዕርራይ  ክግበረሉ  ኣለዎ  ዝብል 

እምነት ዝሓዝና። 

እዚ  ከም  ዘሎ  ኮይኑ፣  ልዕል  ኢሉ  ከም  ዝተገለፀ  ኣብቲ  ፖሊሲ  ሕርሻ 

ዝመርሖ  ኢንዱስትሪያላዊ  ምዕባለ  ጋህዲ  ንምግባር  ተሓሲቡ  ዓይነታት  ዘራእቲ 

ምብዛሕን ናብ ክባር ዋጋ ዘውፅኡ ዝራእቲ ምስግጋርን ንወፃኢ ዕዳጋ ዝውዕል 

ምህርቲ  ምድጋፍን  ኣድላዪ  ከም  ዝኾነ  ተኣሚንሉስ  ከም  ኣንፈት  ተታሒዞም 

ክስርሑ ከም ዘለዎም የቐምጥ። እዚ ግን ባዕሉ ዝኸኣለ ፀገማት ከም ዘለዎ ኣብ 

ትግራይ ብግብሪ ተራእዩ እዩ።  

እቲ  ምኽንያት  ድማ  ግልፂ  እዩ፣  ውሽጣዊ  ዓቕሚ  ሓረስታይ  ትግራይን 

ተፈጥሮኣዊ  ሃፍተ-ገነት  ክልልናን  ዘለዉዎ  ጭቡጥ  ኩነታት  ነዚ  ፖሊሲ  ናብ 

መሬት  ንምሽራፍ  ኣብ  ዘኽእል  ኩነታት  ስለ  ዘይኮኑ  ንሓረስታይና  ዓበይቲ 

ፈተናታት ኮይኖምዎ ይቕፅሉ ስለ ዘለዉ እዩ። ኣብ ርእሲኡ ድማ እዚ ፖሊሲ 

ናብ  መሬት  ንምውራድ  እንትሕሰብ  ጎናጎኒ  ክስርሑ  ዝነበሮም  ስራሕቲ  ማለት 

ናይ ኣግሮ ፕሮሰሲንግ ትካላት ስለ ዘየለዉ ንቐፃሊ ‘ውን ዕንቅፋት ኮይኑ ክቕፅል 

እዩ።  እስቲ ቁሩብ ዝርዝር ኣቢልና ክንርኢ ንፈትን። 

 

4/ ክባር ዋጋ ዘለዎም ዘራእቲ (Higher-Valued Crops) ምትእትታው  

እቲ  ቀዳማይ  ትልሚ  ዕቤትን  ስግግርን  (GTP-1)  ዝነበሮ  ድኽመትን 

ጥንካረን  ብምግምጋም  ኣብቲ  ካልኣይ  ትልሚ  “ንኤክስፖርት  ዝኸውን  ምህርቲ 

ሕርሻና  ከፍሪ፣  ካልኣይ  ኣብ  ውሽጢ  ዓዲ  ንዝርከባ  ፋብሪካታት  ጥረ  ኣቕሓ 

ከቕርብ፣  ሳልሳይ  እቲ  ዝፈሪ  ‘ውን  ናብ  ኣግሮ  ፕሮሰሲንግ  ዝኣትወሉ  ኩነታት 

ብምፍጣር ሕርሻና ናብ ዓብዪ ናይ ስግግር ብርኪ ክበፅሕ ክስራሕ እዩ” ይብል 

ክልላዊ መንግስቲ ትግራይ። ከምቲ ኣብቲ ፖሊሲ ዝብሎ ንኤክስፖርት ዝኸውን 

ክባር ዋጋ ናብ ዘለዎም ዘራእቲ (higher-valued crops) ምእታው ዝብል ሓሳብ 

ከም ሓሳብ ፅቡቕ’ኳ እንተኾነ ንሱ’ውን ናይ ባዕሉ ፀገም ኣለዎ። 

ብማሕረስ ዝናበር ህዝብና ጊዜ ዘይህብ ሕፅረት ቀለብ እንዳሃለዎ ኣሚኑሉ 

ናብ  ንኤክስፖርት  ዝውዕሉ  ክባር  ዋጋ  ዘለዎም  ዘራእቲ  ክኣቱ  ክፅገም  እዩ። 

ምኽንያቱ እቶም ዝለዓለ ዋጋ ዘለዎም ዝበሃሉ ገሊኦም ዘርእታት ‘ውን ዓብዮም 

ፍርያት ክህቡ ብተነፃፃሪ ነዊሕ እዋን ዝወስድ ብምዃኑ ቀለብ ዘይብሉ ሓረስታይ 

እዚ  ክቕበል  ኣፀጋሚ  ይገብሮ።  ብግብሪ  ‘ውን  ከም  ዝተርኣየ  መረዳእታታት 

ኣለዉ።  ካልኣይ፣  ምምሕያሽ  መፍረያይነት  መሬትን  ተወሳኺ  መጠን  መሬትን 

ጥራይ  ዘይኮነ  ዝሓትትስ  ሱር  ነቀል  ለውጢ  ከምፅእ  ዝኽእል  ቀረብ  እዞም 

ክባራት  ዘራእቲ  ምርግጋፅ፣  ነቶም  ሓደሽትን  ክባራትን  ዘራእቲ  ዝምጥን 

ዘተኣማምን  ናይ  ማይ  መጠን  ምውናን፣  ሕርሻ  ንምምሕያሽ  ዘኽእል  ትሕተ 

ቕርፅን ናይ ቴክኖሎጂ እታወታትን ምህላው፣  

እቲ ዝድለ ለውጢ ንኸምፅእ ዘኽእል ሙያዊ ስልጠና ምሃብን ብሓፈሽኡ 

ናይ  ሓረስታይ  ንዋታውን  ገንዘባውን  ዓቕምን  ምህላው  ዝጠልብ  እዩ።  በቲ 

ዝድለ  ቕልጣፈ  ካብ  ሽግር  ከውፅኡና  ከም  ዘይኽእሉ  ክሳብ  ሐዚ  ዘሎ  ዓቕሚ 

ህዝብና  ምርኣይ  ባዕሉ  መረዳእታ  እዩ።  ሳልሳይ፣  ናይ  ሕርሻ  ውፅኢት 

ተቐቢሎም ፕሮሰስ ዝገብሩ ፋብሪካታት ኣብ ዘየለውሉ። ራብዓይ፣ ናይ ውሽጥን 

ናይ ደገን ዕዳጋ ምትእስሳር ድኹም ኣብ ዝኾነሉን ምዝባዕ ዋጋ ዕዳጋ ልሙድ 

መስርሕ ኣብ ዝኾነሉን ኩነታትን ሓረስታይ ምህርቱ ናብ ዝልዓለ ዋጋ ዘውፅኡ 

ዘራእቲ ምቕያር ንሓደጋ ዘጋልፆ ከም ዝኾነ ተራእዩ እዩ። 

ንኣብነት ናይ ኮሚደረ መዐሸጊ ትካል ስለ ዘይብልና ብማሕበር ተወዲቦም 

ኮሚደረ  ዘምረቱ  ውልቀ  ሰባትን  ጉጅለታትን  ፍርያቶም  ዘልዕለሎም  ስኢኖም 

በስቢሱ  ተበላሺና  ክብሉ  ብድምፂ  ወያነ  ሰሚዕና  ነይርና።  እዚ  ኣብ  ሶማሌ 

ክልል´ውን  በሰፊሑ  ዝርአ  ዘሎ  ሽግር  እዩ።  ንሱ  ጥራይ  ኣይኮነን፣  ሓረስታይ 

ንቐለብ ዝውዕል እኽሊ (ጣፍ፣ ስርናይ፣ ስገም፣ ምሸላ፣ ዕፉን፣ ዳጉሻ፣ ዓተር ወዘተ) 

ምፍራይ  ገዲፉ  ናብ  ንፋብሪካ  ዝውዕሉ  ክባራት  ዝራእቲ  (ሰሊጥ፣  ንሁግ፣  ጡጥ፣ 

ኦቾሎኒ፣  ፍራፍረ  ወዘተ)  ኣብ  ዘተኣታትወሉ  እዋን  ካልኦት  ንዕለታዊ  ሃልኪ 

ዝውዕሉ  ኣእኻል  ኣብ  ዕዳጋ  ሕፅረት  ስለ  ዘጋጥም  ዋጋ  ምንሃሩ  ዘይተርፍ 

ይኸውን። እዚ ናይ ዋጋ ምውሳኽ ድማ ህዝብና ክስከሞ ኣይኽእልን። ዝማዕበላ 

ሃገራት  ናብ  ከምዚ  ዓይነት  ስግግር  ኣብ  ዝገብራሉ  እዋን  እቲ  ሕፅረት  እኽሊ 

ንምፍታሕ  ካብ  ወፃኢ  የእትዋ።  ሃገርና  ግን  ኣብዚ  ዘላቶ  ብርኪ  ዕቤት  ከምኡ 

ክትገብር  ዓቕሚ  የብላን  ጥራይ  እንተይኮነስ  ብስሩ’ውን  ንሕርሻ  ዝኸውን 

መሬትን  ማይን  እንዳሃለዋ  ምግቢ  ንወፃኢ  ክትሰድድ  እምበር  ከተእቱ 

ኣይግባእን።  

ብግልባጡ  እኹል  ዝኾነ  ፍርያት  እቶም  ንብሎም  ዘለና  ክባራት  ዘራእቲ 

ኣብ ዘይብሉ ፋብሪካ ምትካልስ ሽግር‘ዶ ኣይኮነን? ኢሉ ንዝሓትት መልሱ እወ 

ሽግር  እዩ።  እኹል  እታወታት  ኣብ  ዘይፈርየሉ  ኩነታት  ዝኾነ  ዓይነት  ናይ 

ኣግሮ  ፕሮሰሲንግ  ትካል  ምትካል  ኣየዛልቕን።  እንተኾነ  ግን  እዚ  ኣብ  ሃገርና 

መሠረታውን ዘላቕን ዝኾነ ሽግር የብሉን።  

ምኽንያቱስ  ባሕሪ  እንተይሰገርና  ብበዝሒ  ካብ  ዝምርቱ  ክልላት  ሃገርና 

እናምፃእኻ  ’ውን  ኣብ  ትግራይ  ፋብሪካ  ክሰርሕ  ስለ  ዝከኣል።  ሓቂ  እዩ  ብዘይ 

እኹል ጥረ ኣቕሓ ወይ ናይ ሕርሻ ፍርያት ፋብሪካታት ምትካል ሽግር ዘለዎ 

ዘምስሉ  ኩነታት  ኣብ  ሃገርና  ኣለዉ  እዮም።  ንኣብነት  ኣብ  2005  ዓ.ም  ኣብ 

ኢትዮጵያ  ኣብ  ዝገበርናዮ  ሓፂር  ዳህሳሳዊ  መፅናዕቲ  ናብ  33  ዝግመቱ 

መብዛሕትኦም  ኣናእሽቱን  ኣረግቶትን  ዝኾኑ  ናይ  ምግቢ  ዘይቲ  መፅሞቒ 

ትካላት ኣብ  መላእ ሃገር  እንዳሃለዉ 79  ሚኢታዊ  ናይ  ብልዒ  ዘይቲ  ዝመፅእ 

ካብ ወፃኢ ከም ዝኾነ ኣረጋጊፅና። ካብ ዝምልከቶም መንግስታዊ ኣካላት እኹል 

መረዳእታ  ኣኪብና  ምስ  መርመርናዮ  ድማ  ምኽንያቱ  እዚ  ዝስዕብ  ኮይኑ 

ረኺብናዮ። 

እቶም  ዘለዉና  ኣናእሽቱን  ኣረግቶትን  ዘይቲ  መፅሞቒ  ትካላት  ትሕቲ 

ዓቕሞም  ከም  ዘምርቱን  ነዙይ  ቀንዲ  ምኽንያት  ድማ  ዝተመረተ  ናይ  ዘይቲ 

እኽሊ ናብ ወፃኢ ስለ ዝስደድ ኣብ ዕዳጋ ሕፅረት ናይ ዘይቲ እኽሊ የጋጥሞም። 

እዚ  ሕፅረት  ድማ  እተን  ኣብ  ዕዳጋ  ዘለዋ  ዝርካብን  እኽሊ  ዋጋ  ክውስኻ 

ምኽንያት  ፈጢሩ።  እዚ  ድማ  ኣብ  ፍርያቶም  (ዘይቲ)  ዋጋ  ክውስኹ 

ኣገዲዱዎም፣ ኣብ ዘይቲ ዋጋ ብምውሳኾም ድማ እቲ ካብ ወፃኢ ዝመፅእ ዘይቲ 

ፅሬቱ  ብዘየገድስ  ብዋጋ  ተወዳዳራይ  ካብ  ምዃን  ሓሊፉ  ዕዳጋ  ናብ  ምቁፅፃር 

ኣትዩ ዝብል እዩ።  

ብመሰረቱ  እዚ  ክፍተት  ክልተ  ዓበይቲ  ዕድላት  እዩ  ፈጢሩ  ዘሎ። 

ቐዳማይ፣  ሕፅረት  ናይ  ዘይቲ  እኽሊ  ዝፈጠሮ  ክፍተት  ንምምላእ  ኣብ  ሕርሻ 

ዝዋፈር  በዓል  ሃፍቲ  ይጠልብ  ኣሎ።  ብኻልእ  ኣባህላ  እዞም  ናይ  ኣግሮ 

ፕሮሰሲንግ ትካላት ምህላው ንዘይቲ ዝኾኑ ኣእኻል ቀፃሊ ይጠልብ ስለ ዘሎ እዚ 

ሪኦም  ናብ  ምፍራይ  ዝኣትዉ  ሰብ  ሃፍቲ  ዕድል  ዝኸፍት  እዩ።  ካልኣይ፣  እቲ 

ቀዳማይ ኣብ ዝሳኻዕ ዘይቲ ካብ ወፃኢ ካብ ዝኣቱ ኣብ ሃገር ውሽጢ ኣፍሪኻ 

ትትከአሉን ሃፍቲ ትፈጠረሉን ዕድል ዘስፍሕ እዩ ዝኸውን። 

ሰፊሕ ጎላጉልን ወሓዝቲ ሩባታትን ዘለዋ ሃገር እኹል ናይ ዘይቲ እኽሊ 

ኣብ ዕዳጋኣ ስለ ዘይርከባ እቲ ዝበዝሕ ናይ ምግቢ ዘይቲ ካብ ወፃኢ ምእታዋ 

ናይዛ ሃገር ኩለመደያዊ ሕምቀት መግለጺ ገይርካ ጥራይ እዩ ክውሰድ ዘለዎ። 

እዛ  ሃገር  ዘለዋ  ናይ  መሬትን  ማይን  ፀጋታት  ተጠቒምካ  ብዙሕ  ዓይነት  ናይ 

ዘይቲ  ኣእኻል  ብምፍራይ  ናይ  ዓዲ  ውሽጢ  ጠለብ  ኣማሊእኻ  ንወፃኢ  ‘ውን 

ብበዝሒ ንምስዳድ ዝከኣለሉ ዓቕሚ ኣለዋ እዩ። እቲ ልዕል ኢሉ ተገሊፁ ዘሎ 

ኩነታት ‘ውን ኣብ ሃገርና እኹል ናይ ዘይቲ ኣእኻል ብምፍራይ ናይዘን ትካላት 

ጠለብ ክተማልእ ዝከኣለሉ ዕድል ከም ዘሎ እዩ ዝገልፅ።  

ብኻሊእ ኣባህላ ኢንዱስትሪ እንተሃልዩ እቶም ዝተጠቐሱ ዕድላት ክፈጥር 

እዩ  ማለት  እዩ።  ንኣብነት  ካብ  ምሸላ  ባሕሪ  ዘይቲ  ዘምርት  ትካል  እንተዝህሉ 

ብዋጋ  ዝረኸሰ  በዝሒ  ዘለዎ  ዘይቲ  ኣብ  ዕዳጋ  ምሃለወን  ናይ  ወፃኢ  ሸርፊ 

እናኸፈልካ ካብ ወፃኢ ነእተወሉ ኩነታት´ውን ጠጠው መበሎ ነይሩ። ነዙይ´ውን 

እዩ መሰረታዊን ዘላቕን ዝኾነ ሽግር የብሉን ንብል ዘለና። 

እዚ ናብ ትግራይ እንተውርዲናዮ ‘ውን ብተመሳሳሊ ኢንዱስትሪ ፈጢርካ 

እዞም ዝተብሃሉ ዕድላት ምፍጣር ይከኣል እዩ። እንተገደደ ድማ ኣብ ትግራይ 

ሓረስታይናን  ሕርሻናን  ናብ  ዝሐሸ  ብርኪ  ክሳብ  ዝበፅሕ  ካብ  ካልኦት  ክልላት 

ንፋብሪካ  ዝኸውን  እታወታት  እናምፃእኻ  ምስራሕ  ይከኣል  እዩ።  ነቲ  ክልልን 

ህዝብን  ‘ውን  ዓቕሚ  ክፈጥረሉ  ምኸኣለ።  እቲ  ቀንዲ  ነገር  እተን  ዝትከላ 

ኢንዱስትሪታት  ክልልና  ብሓፈሽኡ  ‘ውን  ሃገርና  ዘለዋ  ተፈጥሮኣዊ  ፀጋታት 

መሠረት ዝገበራ ክኾና ይግባእ።  

እዘን ንብለን ዘለና ዓይነት ኢንዱስትሪታት ኣብ ዘይሃነፅናሉ፣ ዘተኣማምን 

ናይ  ዕዳጋ  ምትእስሳር  ኣብ  ዘየለሉ፣  ብዓብይኡ  ድማ  ውሕስና  ምግቢ  ኣብ 

ዘይረጋገፀሉ  ኩነታትን  ንሓረስታይና  ናብ  ክቡራት  ዘራእቲ  ክኣቱ  የፀግመሉ 

እዩ።  ብምዃኑ  ድማ  ትግራይ  ኢንዱስትሪ  ዝወልድ  ሕርሻ  እናበልካ  ጊዜ  ካብ 

ምብኻን ኣብ ትግራይ ዘሎ ሕርሻ ቅድሚ ኩሉ ናይ ምግቢ ውሕስና ንምርግጋፅ 

ጥራይ  ትኹረት  ገይሩ  ክሰርሕ፣  ህንፀት  ኢንዱስትሪ  ግን  ዝለዓለ  ትኹረት 

ተዋሂቡዎ  እንተዝስራሕ  እዩ  ዘዋፅእን  ነቲ  ዘለናሉ  ወድዓዊ  ኩነታት  ዝምጥንን 

እሞ ኣብ ክልልናን ዘለዉ ተኽእሎታትን መማረፂታትን ክንርኢ ንፈትን። 

5/ ትግራይን ዘለዉ መማረፅታትን፣ 

ብማሕበር ተጋሩ ኣብ ኣውሮፓ ብዝብል ቅድሚ 31 ዓመት፣ ማለት ‘ውን 

1985 ዓ.ም.ፈ ዝተፅሓፈት መፅሄት ”ደደቢት” ሕርሻን መፃኢ ቁጠባዊ ኣንፈት 

ትግራይ  ኣመልኪቱ  ኣብቲ  እዋን  ዝነበረ  ኣረዳድኣን  ትንተናን  ህወሓት  ከምዚ 

ዝስዕብ የቐምጥ: 

”ህዝቢ ትግራይ ተፀባዪ ሓገዝ ዘይኮነስ ዓርሱ ዝኽእል ንክኸውን ብዙሓት 

ናይ ትምህርትን ኢንዱስትሪን ማዕኸናት ክኽፈታ ኣለወን” ይብል። ሕልፍ ኢሉ 

እውን  ”ትግራይ  ብሕርሻ  ጥራይ  ዘይኮነ  ብማዓድናዊ  ሃብቲ፤  ብኢንዱስትሪያዊ 

ስራሕቲን  ብቱሪዝምን  ዓብዪ  ምዕባለ  ክተመዝግብ  ትኽእል  ንናይ  ዓርሳ  ህዝቢ 

ብራህዋ ክተንብር እትኽእል ዓዲ እያ። እዙይ ከይርድኦ ዝኽእል ኣብ መስፍናዊ 

ፀልማት  ዘሎ  ብምዕባለን  ግስጋሰን  ብሳይንስን  ብቕያ  ውፁዕ  ህዝብን  ዘይኣምን 

ጥራሕ እዩ” ይብል። 

እቲ ፖለቲካዊ ፍረጅኡ ይፅነሐልና’ሞ፣ እወ ትግራይ ብተፈጥሮ ሃፍታምን 

ብዙሕ  መማረፂታት  ዘለዉዋን  ክልል  እያ።  ብምዃና  ድማ  ቁጠባዊ  ኣንፈት 

ትግራይ  ከምቲ  ኣብዛ  መፅሄት  ተገሊፁ  ዘሎ  እዩ  ክኸውን  ዘለዎ።  ኣብ  ሕርሻ 

ዝግበር  ፃዕሪ  ተጠናኺሩ  ክቕፅል  ኣድላዪ’ኳ  እንተኾነ  ጉዱእ  መሬት፣  ድሑር 

ሜላ  ኣተሓራርሳ፣  ትሑት  መፍረያይነት፣  ንኡሽተይ  መጠን  መሬት  እሞ  ድማ 

ሓዱሽ  ዝባፅሐ  ወለዶ  ዝጥምታ፣  ንቐፃሊ  ‘ውን  እናዓበየ  ዝኸይድ  ዘሎ  በዝሒ 

ህዝብን  ውስኑነት  ተሓራሲ  መሬትን  (ኣብ  ትግራይ  ዘሎ  ዘይቃዶ  መጠን 

ተሓራሲ መሬት፤ እናተመላለሰ ዝመፅእ ድርቂን ትሑት ኣፈፃፅማን ኣብ ግምት 

ብምእታው ኣብ ትግራይ ‘’ሕርሻ ዝመርሖ ኢንዱስትሪያዊ ምዕባለ’’ ንምውላድ 

ክሳብ  ሐዚ  ብዘሎ  ከይዲ  ይከኣል  እዩ  ኢልካ  ንኽትወስድ  ዘእምን  ኩነታት 

ኣይረአናን።  መንግስቲ  ግን  ሐዚ’ውን  ሕርሻ  መሪሕነቱ  ክቕፅል  እዩ  ይብል 

ኣሎ። 

ኣብ ወርሒ መስከረም 2008 ዓ/ም ብወይን ቃለ መሕትት ዝተገበረሎም 

ኣይተ  ኣባይ  ወልዱ  ”መሪሕነት  ሕርሻ  ክቕፅል  እዩ።  ኢንዳስትሪ  ቅድሚ 

መሪሕነት  ምርካቡ  ንኢንዳስትሪ  ዝምቹ  ኩነታት  ክፈጥር  ዘለዎ  ሕርሻ  እዩ  … 

ኣብቲ  ቀፂሉ  ዘሎ  ካልኣይ  ’ጂቲፒ’  ግን  ኢንዳስትሪ  ናይ  ሕርሻ  መሪሕነት 

እናተረከበ  ዝኸደሉ  ኩነታት  እዩ  ክህሉ”  ይብሉ።  እዚ  ናብ  ጭቡጥ  ዝሽረፍ 

እንተዝኸውን  ግርም  ነይሩ።  ግና  ሕርሻና  ዘለዎ  ትሑት  ብርኪ  መፍረያይነት፣ 

ኣብ  ዙርይኡ  ዘለዉ  ሰብን  ተፈጥሮን  ዝወለዶም  ፈተነታት፣  ክሳብ  ሐዚ  ዘሎ 

ኣዝዩ  ዝተሓተ  ውፅኢትን  እቶም  ልዕል  ኢሎም  ዝተጠቐሱ  ካልኦት 

ምኽንያታትን  ኣብ  ሒሳብ  ኣእቲኻ  ብድምር  እንትርአ  ሕርሻ  ኢንዱስትሪ 

ፈጢሩስ  ኣብዚ  ዝበሃል  ዘሎ  ሓፂር  ግዜ  ኢንዱስትሪ  መሪሕነቱ  እናተረከበ 

ዝኸደሉ ኩነታት ክፍጠር እዩ ኢልካ ንኽትወስድ ዘእምነካ ምልክት’ውን የለን። 

ብኣንፃሩ  ኣብ  ኢንዱስትሪ  ምህናፅ፤  ምስፍሕፋሕ  ንግድን  ግልጋሎት 

ዘፈርን ዝግበር ፃዕሪ ካብቲ ሐዚ ዘለዎ ጎታት ኣካይዳ ብብዙሕ ዕፅፊ ክቕልጥፍን 

ክበዝሕን  እንተተገይሩ  ግና  እቶም  ልዕል  ኢሎም  ኣብቲ  ስትራተጂክ  ፖሊሲ 

ዝተጠቐሱ  ሓሳባት  ምፍፃም  ዝከኣለሉ  ዓቕሚ  ምፍጣር  ይከኣል  እዩ።  ብኻልእ 

ኣበሃህላ  ተፈጥሮኣዊ  ትሕዝቶ  ፀጋታት  ክልልና  ኣብ  ግምት  ብምእታው  ኣብ 

ትግራይ ዘሎ ሕርሻ ኢንዱስትሪ እንተዝመርሖ ውፅኢታዊ ምኾነ ንምባል እዩ። 

እዚ  ማለት  ግን  ኣብ  ሕርሻ  ዝግበር  ፃዕሪ  ካብቲ  ዘለዎ  ክቕንስ  ኣለዎ  ንምባል 

ዘይኮነስ ብመጠንን ብትሕዝቶን ካብቲ ዘለዎ ወሲኽካ ምስ ኢንዱስትሪን ንግዲን 

ኣገልግሎት  ዘፈርን  ተፀጊዑ  መጀመርታ  ውሕስና  ምግቢ  ሙሉእ  ብሙሉእ 

ዘረጋግፀሉ  ናብ  ዝሓሸ  ብርኪ  ምስ  በፅሐ  ድማ  ናይ  ኢንዱስትሪ  (ናይ  ዓዲ 

ውሽጢን ወፃኢን) እታወታት ዘፍርየሉ መስርሕ ምኽታል የድሊ ንምባል እዩ። 

ምስ  ኢንዱስትሪን  ንግድን  ኣገልግሎት  ዘፈርን  ተፀጊዑ  ክበሃል  እንከሎ 

ኢንዱስትሪን  ንግድን  ኣገልግሎት  ዘፈርን  ብምዕባዮም  ዝፍጠር  ሃገራዊ  ዓቕሚ 

ንምባል ተደልዩ እዩ። ከመይ ኢሉ? ንዝብል፣ 

ምስፍሕፋሕ  ንግዲን  ኣገልግሎት  ዘፈርን  ከምዘሎ  ኮይኑ  እዞም  ዝህነፁ 

ኢንዱስትሪታት ተፈጥሮኣዊ ትሕዝቶን ፀጋታት ክልልና መሠረት ዝገበሩ ኣብ 

ዝኾኑ  እቲ  ድሑር  ሕርሻና  ንምምሕያሽን  በቢደረጅኡ  ብሉፅ  ቴክኖሎጂ 

ዝጥቀም ንምግባርን ብሓፈሽኡ ተፈጥሮ ሃፍትና ብዝግባእ ንምጥቃም ዘኽእለና 

ገንዘባውን  ንዋታውን  ቴክኒካውን  ዓቕሚ  ዝፈጥሩልና  ስለዝኾኑ  እዩ። 

ኢንዱስትሪታት እንተሃልዮምና ምህርቲ ሕርሻ ’ውን ናብ ዝኣትዎ ኣይስእንን።  

ፅሟቕ  ዝዕሽግ  ሓደ  ትካል  ኣብ  ትግራይ  እንተዝህሉ  ኣብ  ራማ-ሓመዶ 

ዝፈሪ  ዘሎ  ማንጎን  ኣራንሺን፣  ኣብ  ራያ-ኣላማጣ  ዝፈሪ  ዘሎ  ፓፓያን  ማንጎን፣ 

ኣብ  ምዕራብ  ትግራይ  ብሩባ-ተከዘ  ዝፈሪ  ዘሎ  ሙዝን  ፓፓያን  ዝበለፀ  ዋጋ 

ኣውፂኡ  ንኻልኦት  ‘ውን  ናብቲ  ናይ  ምፍራይ  ዓውዲ  ክኣትዉ  መተባብዐን 

ንህዝብን ሃገር’ውን ምጠቐመ። 

ኣብ  ትግራይ  ኢንዱስትሪ  ንምህናፅ  ዘኽእሉና  ብዙሓት  ካልኦት  ዕድላት 

ከም ዘለዉና ’ውን ይፍለጥ እዩ። ንኣብነት ቢሮ ኢንዱስትሪን ንግድን ብሄራዊ 

ክልል  ትግራይ  ኣብቲ  ክልል  ዘለዉ  ዝተፈላለዩ  ናይ  ኢንቨስትመንት  ዕድላት 

መማረፂታት  ዳህሳስ  ብምክያድ  ምስ  ኣጭርቕቲ፣  ቆርበት፣  ኬሚካል፣  ላስቲኽን 

ጎማን፣  ሓፂን  ተንከፍ  ዘይኮኑ  መዓድናት፣  ሓፂንን  ኢሌክትሮ  መካኒካልንን፣ 

ምግብን  መስተን  ዝመሰሉ  ምስራሕ  ከም  ዝከኣል  ኣብ  ዘውፀኦ  መፅናዕቲ 

ይገልፅ።  ኣብዚ  ግና  ዓበይትን  ኣናእሽቱን  ሰብ  ሃፍቲ  ኣብዞም  ዝተጠቐሱ 

ዓውድታት ንምውፋር መንግስቲ ተወሳኺ ፃዕሪ ክገብር እንተዘይክኢሉ ትርጉም 

ዘለዎ ኣይኮነን።  

ብስሩ  ‘ዉን  ኣብዞም  ናይ  ኢንቨስትመንት  ዕድላት  እኹል  ፍልጠት 

ምዝርጋሕ ስለ ዘድሊ ሰብ ሙያን ሰብ ሃፍትን ዝራኸቡሉ መተባቢዒ መድረኻት 

ምፍጣር  የድሊ።  ናይ  ፍልጠት  ክፍተት  ከም  ዘሎ  ግልፂ  እዩ።  ንኣብነት  ኣብ 

ርእሰ ከተማና መቐለ ተሰሪሖም ኣፎም ከፊቶም ዝሓድሩ ዘለዉ ገዘፍቲ መንበሪ 

ኣባይቲ ንምስራሕ ዝወፀ ገንዘብ ኣብ ማኑፋክቸሪንግ ዊዒሉ እንተዝኸውን ዛጊድ 

ክንደይ ሃፍትን ሃፍታምን በዓል ሙያን ናይ ስራሕ ዕድላትን ፈጢሩ ምሃለወ። 

እምበኣርከስ  ቀልጢፍካ  ኢንዱስትሪታት  ምህናፅ  እቲ  ልዕል  ኢሉ 

ዝተጠቐሰ  ጥራይ  ኣይኮነን  ረብሑኡ።  ነቲ  ዓመት  ዓመት  ካብ  ዩኒቨርሲቲ፣ 

ኮሌጅን  ላዕለዋይ  ብርኪ  ቤት  ትምህርቲን  ዝወፅእ  ዘሎ፣  ብስእነት  ስራሕ 

ምኽንያት  ካብ  ገጠር  ናብ’ተን  ስራሕ  ደላዪ  መንእሰይ  ዝመልአን  ከተማታትና 

ዝውሕዝ  ዘሎ  መንእሰይ፣  ነቲ  ካብ  ሩባታት  ትግራይ  ወርቂ  ኣሪኻ  ተባሂሉ 

ዝእሰር፤  ዝቕፃዕን  ዝንገላታዕን  ዘሎ  መንእሰይ፤  (ውሕጅ  ንበረኻታት  ሱዳን 

ዝወስዶ ወርቂ ዝኣረየን ንርእሱ ስራሕ ዝፈጠረን ዜጋ ኣብ ክንዲ ንሃገርን ዜጋን 

ብዝጠቅም  ኣገባብ  ስርዓት  ምትሓዝን  ምድጋፍን)፣  እንዳ  ጫት  ቡንን  ፎቖዶ 

ፅርግያን ቐንፈዘው ዝብል ዘሎ ከተመታይን፣ ካብኡ ሓሊፉ’ውን ሓደገኛ ብዝኾነ 

መንገዲ  ንስደት  ዘምርሕ  ዘሎ  ሙሁርን  ዘይሙሁርን  ዜጋ  ስራሕ  ዝፈጥሩልና 

እዮም። 

ክርሳዕ  ዘይብሉ  ጉዳይ  እንተሃለወ  ትግራይ  እዚኦም  ጥራይ  ኣይኮኑን 

ሽግራ፣  ብሰንኪ  ኲናትን  ተፈጥሮን  ‘ውን  ብተዛማዲ  ቁፅሪ  ህዝባ  እንትርአ  ካብ 

ኩለን ክልላት ሃገርና ዝበዝሐ ናይ ኣካል ስንክልና ዘለዋ ክልል ከም ዝኾነት ናይ 

2007  ዓ.ም.ፈ  ፀብፃብ  ሴንትራል  ስታቲስቲክስ  ኤጀንሲ  ኢትዮጵያ  የመልክት። 

እዞም  ኣብዚ  ዝምደቡ  ወገናትና  ዝበዝሑ  ጥር  ትብል  ኣታዊ  ዘይብሎምን 

ተጠወርቲ፤  ብቁፅሪ  ቀለልቲ  ዘይበሃሉ’ውን  ብልመና  ዝመሓደሩ  ከም  ዝኾኑ 

ይፍለጥ።  

ስራሕ ምፍጣር ቁጠባዊ ዓቕሚ ሕብረተሰብና ምድንፋዕ ማለት ስለዝኾነ 

እዞም  ወገናት’ውን  ብቐጥታ  ወይ’ውን  ብተዘዋዋሪ  እትዋት  ዝረኽቡሉ  ኩነታት 

ምፍጣር  ማለት  እዩ  ዝኸውን።  ብሓፈሽኡ  ነቲ  ኣብ  ትግራይ  ዘሎ  ገዚፍ  ቁፅሪ 

ስራሕ  ኣልቦ  መንእሰይ  ስራሕ  ዝፈጥሩን  ናይቲ  ክልል  ቁጠባዊ  ዕቤትን 

ልምዓትን ዘረጋግፁ ትካላት ብቕልጡፍ እንተዘይተሃኒፆም ሳዕቤኑ ከቢድ ምዃኑ 

ምርዳእ የድሊ። 

እሞ  እምበኣር  ኢንዱስትሪታት  ምህናፅ  ብሙያ  ዝሰልጠነ  ሰብ  ብቐፃሊ 

ይጠልብ።  እዚ  ጠለብ  ድማ  ናይ  ሙያ  መሰልጠኒታት  ንምኽፋት  ዕድል 

ይፈጥር፣  ካብኡ  ድማ  ስራሕ  ይፈጥር፣  መሰረተ  ልምዓትን  ከተማታትን 

ንምስፍሕፋሕ  ምኽንያት  ይኸውን፣  ናይ  ኣገልግሎት  ዘፈር  ‘ውን  ናብ  ዝለዓለ 

ብርኪ የሰጋግር። እዚኦም ኩሎም ተደሚሮም ድማ ተወሳኺ ናይ ስራሕ ዕድል 

ይፈጥሩ።  እዚ  ድማ  ቁጠባዊ  ዕቤት  የምፅእ፣፣  ተደሚሩ  ሰብኣዊ  ልምዓት 

ንምርግጋፅ ቀንዲ ምኽንያት ይኸውን፣፣ ቁጠባውን ሰብኣውን ልምዓት ድማ ኣብ 

መላእ ሃገር ሰላምን ምርግጋዕን ፈጢሮም ሃገርና ናብ ማእኸላይ ኣታዊ ዘለወን 

ሃገራት ብምፅንባር ኣብ ዘተኣማምን ብርኪ ምዕባለ ክትቅፅል የኽእላ። 

ብሓፂሩ  ከምቲ  እቲ  ፖሊሲ  ዝብሎ  ኣብ  ትግራይ  ሕርሻ  ዝመርሖ 

ኢንዱስትሪያላዊ ምዕባለ ዝጭበጥ እንተዝኸውን ግርም ነይሩ። ንምንታይ’ሲ እቲ 

ዝበዝሐ ህዝብና  ሓረስታይ  ስለዝኾነ።  እቲ  ሓቂ ግና  ኣብ ትግራይ  ክሳብ  ሐዚ 

ሕርሻ  ዝወለዶ  ኢንዱስትሪ  ይትረፍ’ሞ  ናይ  ዓመት  ቀለብ  ክነማልእ 

ኣይከኣልናን።  ከምቲ  ዝበሃል  ዘሎ  ኢንዱስትሪ  ንምምዕባል  ሕርሻ  እንድሕር 

ንፅበ ኮይንና ተፈጥሮ ሃፍትና ብኣግባቡ ንምጥቃም ዘኽእል ገንዘባዊ፣ ንዋታውን 

ቴክኒካውን  ዓቕሚ  ኣይህልወናን፣፣  ሓረስታይና  ካብቲ  ዘለዎ  ኣስካፊ  ኩነታት 

ኣይወፅእን፣፣  ነዚ  ዝመሃር  ዘሎ  ሓዱሽ  ወለዶ  ዝኸውን  ስራሕ  ኣብ  እዋኑ 

ኣይፍጠርን፣፣  

ብሓፈሽኡ ህዝብና ኣብ ዝደኸመ ቁጠባዊ ዓቕሚ ክቕፅል ይግደድ። ከም 

ውፅኢቱ  ድማ  ተስፋ  ዝቖርጽ፣  ንዓዱ  ዘይግደስ፣  ናዕቢ  ንምልዓልን  ወንጀል 

ንምፍፃምን ንድሕሪት ዘይብል ዜጋ ይፍጠር፣፣ ከም ሃገርን ህዝብን ኣብ ድኽነት 

ንፀንሖ  እዋን  ይነውሕ፣  ሽግርና  ኣብ  ዝተናውሐ  እዋን ድማ  ማሕበረ  ቁጠባዊን 

ፖለቲካዊን ቀውሲ ኣኸቲሉ ሃገርን ህዝብን ናብ ዘየድሊ ኣንፈት የምርሕ። ኣብ 

ከምዚ ዓይነት ሕማቕ ኩነታት ንኸይንወድቕ ሐዚ ነቲ ዘሎ ሽግር ዝምጥን ናይ 

ለውጢን ምትዕርራይን መስርሕ ክዝርጋሕ ግድን ይኸውን። 

 

ይቕፅል...