ፖሊሲ “ሕርሻ ዝመርሖ ኢንዱስትሪያላዊ ምዕባለ” ኣብ ትግራይ ሰሪሑ ዶ? 

ንቐፃሊ”ከ ክሰርሕ ድዩ? ብገብረስላሰ ኣርኣያ፣ 

1ይ ክፋል 

ኣብ ዞባ ቀርኒ ኣፍሪካ ብኤልኒኖን ብዘይኤልኒኖን ዝፍጠር ድርቂ ቀደሙ 

’ውን  እንተኾነ  እናተመላለሰ  ከም  ዝመፅእ  ዝፍለጥ  እዩ።  ድርቅን  ሕፅረት 

ዝናብን መናብርትና ከም ዝኾነ ንሕናን ዓለምን ንፈልጦ። ብምዃኑ ድማ በቲ 

ዘሎ  መንግስቲ  ብሓደ  ወገን  ድርቂ  ዝፃወር  ኢኮኖሚ  ምህናፅን  ኣድላይነቱን 

እንትግለፅ፤  ብኻሊእ  ድማ  ሕርሻ  ዝመርሖ  ኢንዱስትሪያላዊ  ምዕባለ  ክህልወና 

ኣለዎ  እናተብሃለ  ይዝረበሉን  ይሰርሐሉ’ውን  ፀኒሑን  ኣሎን።  ገዚፍ  መጠን 

ባጀት  ብምምዳብ  ከባቢና  ለዊጦም  ሕርሻናን  ምህርትናን  ከማሓይሹ  እዮም 

ዝተብሃሉ ፃዕሪታት ‘ውን ተፈቲኖም እዮም፣ ይቕፅል ‘ውን ኣሎ። ኣብ ትግራይ 

ግና ኣብ ሕርሻ ዝተገበረ ፃዕሪ ኢንዱስትሪ ከማዕብልስ ይትረፍ ውሕስና ምግቢ 

‘ውን ከረጋግፅ ኣይከኣለን። 

  ክሳብ  ሐዚ  ኣብ  ሕርሻ  ዝተገበረ  ፃዕርን  ዝፈሰሰ  ሃፍትን  (ገንዘብ፣ 

ጉልበት፣ ግዘን ካልእን) ብዙሕ’ኳ እንተኾነ ክንዲ እቲ ዝድለ ለውጢ ስለ ዘይመፀ 

ሐዚ’ውን  ገዚፍ  ቁፅሪ  ህዝብና  ናይ  ዓመት  ቀለቡ  ኣፍርዩ  ካብ  ናይ  ረድኤት 

እኽሊ  ዝወፀሉ  ኩነታት  ኣይተፈጠረን።  እቲ  ዝገርም  (ዘሕዝን  ውን)  ምህርቲ 

ዓፂፉ  እናተብሃለ  ንብዙሕ  ዓመት  ዝተነገረሉን  ሎሚ  ‘ውን  ዝንገረሉ  ዘሎን 

ሓረስታይ ትግራይ ሓደ ድርቂ’ኳ ክፃወር ከም ዘይከኣለ ኣብዚ ዝሓለፈ ዓመት 

ደጊምና ኣረጋጊፅና ኢና። መንግስቲ ዝብሎ’ኳ ካሊእ እንተኾነ እዚ ናይ ሎሚ 

ድርቂ እቶም ክሳብ ሐዚ ዝተሰርሑ ስራሕቲ ካብ ሓደጋ ከም ዘየድሑኑና ግልፂ 

ገይሩዎ እዩ። ቀጥታዊ ትርጉም ናይዚ ድማ ኣብቲ ፖሊሲ፤ ኣብ መሬት ዘሎ 

ጭቡጥ ኩነታት፤ ኣብ ኣካይዳን ኣፈፃፅማን ቀሊል ዘይበሃል ሽግር ኣሎ ማለት 

እዩ። ካሊእ ትርጉም ክህልዎ ኣይኽእልን። 

  እሞ  ደኣ  እቲ  ኩሉ  ግዜ  ዝጠልመና  ሰማይ፤  ገና  ዘይማዕበሉን  ኣብ 

ምጅማር  ዝርከቡ  መስኖታት  እሞ  ድማ  ዝናብ  እንተዘይሃልዩ  ዝነቕፁ፤  ጉዱእ 

መሬትን  ድርቅን፣  ዘይምዕሩይ  ፖሊሲን  ትሑት  ኣፈፃፅማ  መንግስትን  ኣሚንካ 

ዝግበር  ሕርሻ  ድዩ  ኢንዱስትሪ  ከዋልደልና  እዩ  ዝበሃል  ዘሎ?  ብስሩኸ  ኣብ 

ትግራይ  ”ሕርሻ  ዝመርሖ  ኢንዱስትሪያዊ  ምዕባለ”  ጋህዲ  ንምግባር  ዝከኣል 

ድዩ? 25 ዓመታት ረሃፁ ኣንጠብጢቡ ዓርሱ ክቕልብ ዘይከኣለ ህዝቢ ትግራይ 

ብኸመይ  እዩ  ንኢንዱስትሪ  ዘዋልድ  ሕርሻ  ክህልወና  ኢልካ  ዝሕሰብ  ዘሎ? 

ንኸብዲ ዝውዕል ቀልጢፉ ዝፈሪ ስርናይ፤ ስገም፤ ጣፍ፤ ምሸላ ወዘተ ኣፍሪዩ 

ነብሱ  ክቕልብ  ዘይከኣለ  ሓረስታይ  ህዝብና  ከመይ  ኢሉ  እዩ  ንኢዱስትሪ  ወይ 

ድማ  ንወፃኢ  ዕዳጋ  ናብ  ዝውዕሉ  ክባር  ዋጋ  ዘለዎም  ዝራእቲ  (ጡጥ፣  ሰሊጥ፣ 

ፍራፍረ ወዘተ) ክነእትዎ ዝበሃል ዘሎ? ብስሩኸ ሓረስታይና ካብ ሓንቲ ሄክታር 

ዝንእስ  መሬት  እናሓረሰ  እዚ  ዝከኣል  ድዩ?  እዚ  ብምስትውዓልን  ብስነ 

ፍልጠታዊ ስነ ሞጎትን ክርአ ዘለዎ ጉዳይ እዩ። 

  እዚ  ዳህሳሳዊ  ፅሑፍ  ካብ  ጭቡጥ  ትዕዝብቲ  ዝብገስ  ኮይኑ  ንትግራይ 

ጥራይ  ዝምልከት  እዩ።  ቀንዲ  መርገፂ  እዚ  ፅሑፍ  ‘ውን  ካብቶም  ዝስዕቡ 

ሓሳባት  ይብገስ፣-  ’’ሕርሻ  ዝመርሖ  ኢንዱስትሪላዊ  ምዕባለ’’  ዝብል  ሃገራዊ 

ስትራቴጂክ ፖሊሲ ኣብ ትግራይ ክሳብ ሐዚ ኣይሰርሐን ናይ ኣካይዳ መሰረታዊ 

ለውጢ  እንተዘይተገይርሉ  ድማ  ንቐፃሊ  ’ውን  ኣይሰርሕን።  እዚ  ፖሊሲ  ናብ 

ክልላት  እንትወርድ  ከከም  ናይቲ  ክልል  ተፈጥሮኣዊ  ትሕዝቶን  ፀጋታቱን 

(regional context) እናተርኣየ ምትዕርራይ ክግበረሉ ነይሩዎን ኣለዎን፣፣  

እቲ  ፊሒት  ክብል  ዘይከኣለ  ኣብ  ትግራይ  ዘሎ  ሕርሻ  ንኢንዱስትሪ 

ክፈጥር ወይ ድማ ክመርሕ ስለዘይኽእል ንሕርሻ ዝቕይር ካሊእ ዓቕሚ ክሳብ 

ዝፍጠር  ሕርሻ  ትግራይ  ናይ  ምግቢ  ውሕስና  ንምርግጋፅ  ጥራይ  ትኹረት 

ክገብር  ኣለዎ፣፣  ብኣንፃሩ  ካብቲ  ዘሎ  ወለዶታት  ተሻጋሪ  ዝኾነ  ብጣዕሚ 

ዘተሓሳስብ ሽግር ንምውፃእ ሕርሻ ዘይኮነስ ኢንዱስትሪ ቀንዲ ጠመተ ትግራይ 

ክኸውን ኣለዎ ዝብሉ ሓሳባት ምስ ምኽንያቶም የቕርብ። 

ቀንዲ ዕላማ ናይ’ዚ ፅሑፍ ድማ ሙሁራን ኣብዚ ኣርእስቲ ዘለዎም ሞያዊ 

ርኢቶኦም  ብምክፋል  ንፖሊሲ  ሓንፀፅትን/ፖለቲከኛታትን  ሃናፃይ  ሓሳቦም 

ክህቡሉ  ምዕዳም  እዩ።  መንቀሊ  እዚ  ፅሑፍ  ድማ  ምንም  ኣይተሰርሐን 

ዝተለወጠ  ነገር  የለን  ካብ  ዝብል  ዘይኮነስ  ’ሕርሻ  ዝመርሖ  ኢንዱስትሪያዊ 

ምዕባለ’ ዝብል ኣብ ትግራይ ዘሎ ጉጉይ ፖሊሲ ምስ ሕማቕ ተፈጥሮ፤ ድሑር 

ኩነታት  ሕርሻ፣  ድኹም  ውሽጣዊ  ዓቕሚ  ሓረስታይናን  ናይ  ድሌት  ቕደም 

ሰዓብን፣ ድኸመት ኣፈፃፅማ መንግስትን ካልኦትን ተደሚሮም ኣብ ክልልና እቲ 

ዝድለ  ለውጢ  ክመፅእ  ስለ  ዘይከኣለ  እንደገና  ክፍተሽ  ኣለዎ  ካብ  ዝብልን፤ 

ህዝብና  ካብ  ድኽነት  ዝወፀሉ  ዝቐልጠፈ  መንገዲ  ልምዓት  ካብ  ምእላሽን 

ዝፍልፍል  እዩ።  ብምዃኑ  ድማ  እዚ  ፅሑፍ  ዘንብብ  ሰብ  ካብ  ዝኾነ  ፖለቲካዊ 

ውግንናን  ስሚዒትን  ነፃ  ኮይኑ  ኣብቲ  ቀሪቡ  ዘሎ  ዛዕባ  ከድህብን  እንተኺኢሉ 

’ውን  ህዝብና  ካብ’ቲ  ዘለዎ  ኣዚዩ  ዘሰክፍ  ኩነታት  ንምውፃእ  ኣብ ዝግበር  ፃዕሪ 

ብቕንዕና ሃናፃይ ዝብሎ ሓሳብ ከቕርብ ነተሓሳስብ። 

ኣብ  መወዳእታ  እዚ  ኣርእስቲ  ኣመልኪቱ  ከመይ?  ንምንታይ?  እንታይ? 

ዝብሉ ሕቶታት ክለዓሉ ባህሪያዊ ስለዝኾነ ጭቡጥ ኩነታት ትግራይ ምስቲ ኣብ 

ስራሕ  ዘሎ  ፖሊሲ  ብምትሕሓዝ  ክዝትን  ከረድእን  ክፍትን  እዩ።  ውሱናት 

መረዳእታታት እውን ብምጥቃም ኣብ ትግራይ ዘለዉ መማረጺታትን፣ ኩነታትና 

ንምቕያር  ከም  ቕድመ  ኩነት  ክራኣዩ  ዘለዎም  ጠቐመቲ  ሓሳባት  ብዝርዝር 

ክንምልስ ክንፍትን ኢና። 

2/  ብሰብን  ተፈጥሮን  ዝተጎድአ  መሬት  +  ድሑር  ሜላ  ሕርሻን  ትሑት 

መፍረያይነትን  +  ሕፅረት  ማይ  +  ፖሊሲ  ኣልቦ  ስርዓታት  +  ዘይሳነ  ፖሊሲን 

ትሑት  ኣፈፃፅማን  =  ሕሱም  ድኽነት፣  ግዱድ  ተፀባይነትን  ስእነት  ፖለቲካዊ 

ሓርነትን።  

  ኣብ  መጀመርታ  16  ክ/ዘበን  ናብ  ኢትዮጵያ  መፂኡ  ኣብ  ትግራይ 

ዝነብር ዝነበረ ኣልቫሬዝ ዝተብሃለ ፖርቹጋላዊ ኣብ ዶጉዓታት ኢትዮጵያ ዘሎ 

ናይ  ሕርሻን  ኣእኻልን  ኩነታት  እንትገልፅ  ብጣዕሚ  ልሙዕን  መፍረያይን 

እንስሳታት ’ውን ከይተረፋ ኣብ ፅቡቕ ኩነታት ይነበራ ከም ዝነበራ ብምዕዛብን 

ምድናቕን  ኣብቲ  እዋን  ኣዐርዩ  ሕማቕ  ምስ  ዝነበረ  ኩነታት  ኣውሮፓ 

የወዳድሮ።  ብተመሳሳሊ  ኣብ  1698  –  1700  ዓ.ም.ፈ  ኢትዮጵያ  ዝጎብነየ 

ፖንሴት (Poncet) ዝተብሃለ ኣውሮፓዊ ‘ውን ከም ኢትዮጵያ ሃፍታምን ልሙዕ 

መሬትን ዘለዎ ሃገርን ህዝብን ከም ዘይረኣየን፣ ጎቦታት ውን ዝለምዑን ብኣግራብ 

ዝተሸፈኑን  ከም  ዝነበሩን  ኣብ  ፅሑፉ  ይገልፅ።  እዚ  ግን  ብዝተፈላለየ  ናይ 

ተፈጥሮን ሰብን ዝፈጥረዎ ምኽንያታት ከምኡ ኢሉ ክቕፅል ኣይከኣለን። 

  መሬት ትግራይ ቅድሚ ብዙሕ ዘመናት ነይሩዎ ካብ ዝበሃል ሃፍታም 

ተፈጥሮኣዊ  ትሕዝቶ  ናብዚ  ሐዚ  ዘለዎ  ዝሓመቐ  ብርኪ  ንኽበፅሕን  ህዝብና 

ንሕሱም  ድኽነት  ንኽቃላዕን  ዝገበሩዎ  ምኽንያታት  ብዙሓት  ምፅራሕ  ይከኣል 

እዩ። እቶም ቀንዲ ንምጥቃስ፣ ፍልጠት ምንኣስ ዝወለዶ ኣብ ዝተፈላለየ ዘመን 

ዝነበረ  ሕማቕ  ናይ  መሬትን  ደንን  ኣጠቓቕማን  ኣተሓሕዛን  (ሓመድን  ማይን 

ዕቀባ  ዘይምስራሕ፣  ዘይስሩዕ  ናይ  ጋህፂ/መጋሃጫ  ኣጠቓቕማ፤  ናይ  ነዳዲ 

መማረፂ  ዘይምህላውን  ደን  ተይተካእኻ  ምቑራፅን)፣  ብበረኻ  ምስፍሕፋሕን 

ለውጢ  ኣየርን  ምኽንያት  ተፈጥሮ  ምዝባዕ፣  ኣብ  ዝናብ  ፅግዕተኛ  ምዃን፣ 

ብዝሓሸ  ሳይንሳዊ  ፍልጠት  ዘይተደገፈ  ሕርሻ  ምንባሩ፣  መሬት  ኣብ  ኢድ 

ውሑዳት  መሳፍንቲ  ምስ  ምንባሩ  ‘ውን  ሓረስታይ  መሬት  ንምንክብኻብ 

ዘየተባብዕ  ብምዃኑ፣  ሰላምን  ምርግጋዕን  ዘይምህላው፣  ፖለቲካዊ  ቅልውላውን 

ንዘበናት ዘየቋርፅ ኲናት እቶም ቀንዲ ምኽንያታት እዮም። በዞም ልዕል ኢሎም 

ዝተጠቐሱ ምኽንያታት ካብ መጠን ንላዕሊ ዝተጎድአ መሬት ትግራይ ኣሕዊኻ 

ኣብ  ረብሓ  ንምውዓል  ጊዜ፣  ናይ  ቴክኖሎጂን  ገንዘባዊ  ዓቕሚን፣  ምስ  ጭቡጥ 

ኩነታት  ትግራይ  ዝሳነ  ምዕሩይ  ፖሊሲ፣  ናይ  መንግስትን  ናይ  ሓረስታይን 

ዝተዋደደ ዓቕሚን ከም ዝሓትት ርዱእ እዩ። 

ከምቲ ኩሉ ዝፈልጦ ኣብ ዝሓለፉ ዓመታት ሓረስታይና (ኣዴታት ሓናጡ 

ደቀን  ሓዚለን  እንከይተረፈ)  መንግስቲ  ዘውፅኦ  ፖሊሲ  ንምትግባር  ረሃፁ 

ኣንጠብጢቡን  ጊዚኡ  ሰዊኡን  እዩ።  እቲ  ዝተገበረ  ፃዕሪ  ድማ  ድሕሪ  ነዊሕ 

ዓመታት  ውሱን  ለውጢ’ኳ  እንተምፅአ  መነባብሮ  ህዝብና  ዝቕይር  ኣይኮነን። 

ከምኡ  ስለዝኾነ  ድማ  ድሕሪ  ናይ  25  ዓመታት  ድኻም  ‘ውን  እንተኾነ  ዘላቒ 

ፍታሕን  ኢንዱስትሪ  ምምራሕንስ  ይትረፍዋ  ናይ  ዓመት  ቀለቡ  ከፍሪ 

ኣይከኣለን።  ሓደ  ክረምቲ  ድርቂ  ኣጋጢሙ’ኳስ  ፍርቂ  ህዝቢ  ትግራይ  ዓርሱ 

ዝቕልብ  ኮይኑ  ኣይተረኸበን።  ብዘይ  ድርቂ  ’ውን  እንተኾነ  40  ሚኢታዊ 

ህዝብና  ልዕሊ  ሽዱሽተ  ወርሒ  ዓርሱ  ክቕልብ  ዘይኽእል  ምዃኑን  ኣብ  ሴፍቲ 

ኔት  ከም  ዝነብርን  ብበዓል  መዚ  እቲ  ክልል  ክግለፅ  ሰሚዕና  ነይርና።  ኣብ 

ሴፍቲኔት  ዝኣቱ  ድማ  እቲ  ኣብ  ዝኸፍአ  ኩነታት  ሕፅረት  ምግቢ  ዘሎ  ስድራ 

ምዃኑ ግብርና ሚኒስቴር ዝውፅኦ ሰነድ ከምዚ ዝስዕብ ይገልፅ: 

“  ሴፍቲኔት  ቀንዲ  ትኹረት  ዝገብረሎም  ስድራታት  ብጣዕሚ  ኣብ 

ዝኸፍአ  ናይ  ምግቢ  ሕፅረት  ዝነብሩ  ዘለዉ  ስድራቤታት  ኮይኖም  ኣብ  ንቡር 

ወቅቲ [ድርቂ ዘይብሉ] ካብ ሰለስተ ወይ ድማ ካብኡ ንላዕሊ ዝኸውን ኣዋርሕ 

ናይ ምግቢ ሕፅረት ዘለዎም እዮም’ ዝብል ይኸውን።” 

ከምኡ  እንተኾይኑ  ኣብ  ትግራይ  ዘሎ  ስድራ  ካብቲ  ብሃገር  ደረጃ 

ዝተቐመጠ መዐቀኒ ’ውን ኣዝዩ ኣብ ዝሓመቐ ኩነታት ከም ዘሎ የርእየና። እዚ 

ልዕል  ኢሉ  ዝተጠቐሰ  ቁፅሪ  (40%)  ብድርቂ  ምኽንያት  ከም  ዝውስኽ  ርዱእ 

ኮይኑ  ክንድዚ  ዝኣክል  ኣብ  ሴፍቲኔት  ዝነብር  ዘሎ  ህዝቢ  እቲ  መንግስቲ 

ዘቐመጦ  ዝተሓተ  መዐቀኒ  ዓመታዊ  ናይ  ምግቢ  ውሕስና  ኣየረጋገፀን  ማለት 

እዩ።  

ነቲ  ዘጋጠመ  ድርቂ  ንምክልኻልን  ሓደግኡ  ንምቕናስን  ዘኽእል  ዓቕሚ 

ምጥራዩ  ዋላ  እንተረጋገፀ  ብተኸታታሊ  ካልኣይ  ሳልሳይ  ድርቂ  እንተወቒዑና 

ዓመት  ዓመት  እኽሊ  እናሸመትካ  ምቕራብ  ኣይከኣልን  ዘላቒ  መፍትሒ’ውን 

ኣይከውንን።  ብናይ  ሓደ  ዓመት  እኽሊ  ዕደላ  ዝምከት  ድርቂ  ድማ  ኣይኮነን። 

ሓደ  ከቢድ  ድርቂ  ኣብ  ዘጋጥም  ድማ  ኣብኡ  ጠጠው  እንተይበለ  ናብቶም 

ዝቕፅሉ  ዘለዉ  ዓመታት  ዝሰጋገር  ቀጥታዊ  ተፅዕኖ  ኣብ  ሓረስታይና 

ብሓፈሽኡ´ውን ኣብ ሃገርና ብምዕራፍ ናይ ምህርቲ ዓመታት ኣናጊዑ ረድኤት 

ዘድልዮ ህዝቢ  ቁፅሪ  ‘ውን  ክውስኽ  ግድን  ይኸውን።  እዚ ዝሓለፈ ድርቂ  ንሱ 

እዩ ዘርአየና።  

ከምቲ  ምክትል  ርእሰ  ምምሕዳር  ትግራይ  ዶ/ር  ኣዲስኣለም  ባሌማ  ኣብ 

ቀርባ  ዝገለፁዎ  መንግስቲ  ካብቲ  ናይ  ሎምዘበን  ድርቂ  ዝተምሃሮ  ነገር 

እንተሃልዩ  ’ድርቂ  ዝፃወር  ኢኮኖሚ  ከም  ዝሃነፀና  እዩ’  ኢልካ  ነብስኻ  ካብ 

ምድዕዓስ እቲ ክሳብ ሐዚ ዝተሰርሐ ስራሕ ህዝብና ናይ ምንባር ውሕስና ከም 

ዘይፈጠረሉ  ኣረጋጊፅና  እንተዝበሃል  እዩ  እቲ  ትኽክለኛ  መግለፂ  ክኸውን 

ዝነበሮ።  ምኽንያቱ  ረድኤት  ዝዕድል  መንግስቲ  ምፍጣር  በይኑ  ዘላቒ  ናይ 

ምንባር ውሕስና ስለ ዘየረጋግፅ። 

እዚ  ኩነታት  ዝፈጥሮ  ተገዲድካ  ዝእቶ  ተፀባይነትን  ፅግዕተኝነትን  ‘ውን 

ኣብ  ህዝብና  ከቢድ  ስነ  ልቦናዊ  ስንብራት  ዘስዕብ  ከምዝኾነ  ርዱእ  እዩ።  ንሱ 

ጥራይ  ኣይኮነን፣  ናይ  ወፃኢ  ሓገዝ  እናለመነ  ዝነብር  መንግስቲ  ዝተማልአ 

ሉእላዊ  ሃገር  ኣለዎ  ንምባል  ከም  ዘፅግም  ንኸብዱ  ትኸውን  ትካቦ  ካብ  ኢድ 

መንግስቲ እናተፀበየ ዝነብር ህዝቢ ‘ውን ዝተማልኣ ፖለቲካዊ ሓርነት ክህልዎ 

ኢልካ  ዘይሕሰብ  እዩ።  ርሑቕ  እንተይከድና  ሕገመንግስታዊ  መሰሉ  ዝሓተተ 

ህዝቢ  እምባስነይቲ  ብናይ  ረድኤት  እኽሊ  መፈራርሒ  ይግበረሉ  ከም ዝሓገየን 

ይቕፅል ‘ውን ከም ዘሎን ካብቶም ግዳያት ሰሚዕና ኢና። እዚ ናይ መጀመርታ 

እዝንና  ኣይኮነን፣፣  ኣብ  ካልኦት  ከባቢታት  ትግራይ’ውን  ከምኡ  ከም  ዝግበር 

ብሰፊሑ ዝንገር ጉዳይ እዩ።  

እዚታት  ከም  ዘሎ  ኮይኑ  ብዓብይኡ  ድማ  ናይ  ህዝብና  ስቓይን  ናይ 

ልመና ዘመናን ብሄራዊ ሕፍረትናን እናናዋሕና ንነብር። ምኽንያቱ ከም ህዝብን 

ከም  ሃገርን  እናለመንካ  ኩርዓትን  ሓርነትን  ልኣላውነትን  ዝበሃል  ስለ  ዘይህሉ፣ 

ከምቲ  ፕረዚደንት  ግብፂ  ዝነበሩ  መሓመድ  ሑሴኒ  ሙባረክ  ኢሎምዎ  ዝበሃል 

“Whoever does not command the means to feed himself can neither 

feel  freedom  nor  dignity”.  ብሓፂሩ፣  “ዓርሱ  ክቕልብ  ዘይኽእል  ሰብ  ነፃነት 

ይኹን ክብሪ ኣይስምዖን” ንምባል እዩ። እምበርኣርከስ ጭቡጥ ኩነታት ትግራይ 

ከምዙይ  እንዳሃለዉ  እዩ  ሕርሻ  ዝመርሖ  ኢንዱስትሪያላዊ  ምዕባለ  ንምፍጣር 

ዝሕሰብ  ዘሎ።  እስቲ  ንምርዳእ  ዝኣክል  እቲ  ንዓመታት  ዝተሰርሐሉ  ኣብ 

ትግራይ ዘየፍረየ ፖሊሲን ትሕዝቶን ዳህሲስና ክንሓልፍ። 

3/ ፖሊሲ “ሕርሻ ዝመርሖ ኢንዱስትሪያዊ ምዕባለ”  

መብዛሕትአን  ዝማዕበላ  ሃገራት  ካብ  ብማሕረስ  ዝናበር  ሕብረተሰብ  ናብ 

ኢንዱስትሪ  ኣብ  ዝገብረኦ  ጉዕዞ  ሕርሻን  ጥረ  መዓድንን  ምስ  ርካሽ  ናይ  ሰብ 

ጉልበት  ተደሚሩ  ወሳኒ  ተራ  ነይሩዎም።  እቲ  ናይ  ስግግር  መስርሕ  ከከም 

ናይተን  ሃገራት  ትሕዝቶን  ኩነታትን  ዝፈላለ  ኮይኑ  ንኢንዱስትሪ  ዝተጠቐምኦ 

ናይ  ሕርሻን  ፍርያትን  ጥረ  መዓድንን  ግን  ገሊአን  ካብ  ውሽጢ  ዓዲ  ዝነበረን 

እንትኸውን  ገሊአን፣  ብፍላይ  ሃገራት  ኣውሮፓ  ግና  ጎቢጠን  ዝሓዝአን  ሃገራት 

ዝነበረን  ንቐለብ  ዝውዕል  ዝራእቲ  ከም  ዘይምለስ  ብምጥፋእ  ኣብቲ  መሬት 

ንፋብሪከአን  ዘድልየን  ሓዱሽ  ዘራእቲ  ብምትእትታውን  ሓረስቶት  መሬቶም 

መንጢሎም  ናብ  ባሪያ  ብምቕያርን  ዝተፈፀመ  እዩ  ነይሩ።  ፍልፍል  እቲ  ጥረ 

ሃፍቲ ብዝየገድስ እዘን ሃገራት ኢንዱስትሪታት ክሰርሓ እንከለዋ ንዕኡ ዘድለየ 

እታወታት  ’ውን  ካብ  ዓዲ  ዝበዝሕ  ድማ  ካብ  ደገን  ብምርካብ  መፍረያይነትን 

ኣረጋጊፀን ቁጠብአንን ሃገረንን ሃኒፀን እየን። 

 በዝሒ ህዝባ ሓረስታይ ዝኾነት ሃገርና ’ውን እቲ ድሑር ዝኾነ ቁጠባኣ 

መዋቕራዊ ለውጢ ንኽመፅእን ድኽነት ንኽመሓውን ሃገርና ዘዋፅእ እዩ ዝበለቶ 

ሕርሻ  ዝመርሖ  ኢንዱስትሪያላዊ  ምዕባለ  ዝብል  ስትራቴጂክ  ፖሊሲ 

(Agricultural  Development  Led  Industrialization  –  ADLI)  ሓንፂፃ 

ትንቀሳቐስ ፀኒሓን ኣላን።  

እዚ  ዝፍፀም፣  ሕርሻ  ዘመናዊ  ቴክኖሎጂ  ኣታኣታቲኻ  ካብቲ  ዘለዎ 

ምምሕያሽን፣ ብፍላይ ድማ ብሉፅ ዘርኢ ምጥቃም፣ መስኖ ምስፍሕፋሕ፣ ንሕርሻ 

ዘሳልጥ  ትሕተ-ቅርፂ  ምህናፅ፣  ከም  መዳበርያን  ፀረ  ባልዕን  ዘበናዊ  እታወታት 

ምጥቃም፣  ሕርሻ  ተንከፍ  ዘይኮኑ  ዕድላት’ውን  ኣብ  ገጠራት  ብምፍጣር  ከም 

ዝኸውን  ይገልፅ።  ኣብዞም  ሓሳባት  እዚኦም  ተሞርኪሱ  ናብ  ኢንዱስትሪ 

ይሰጋገር’ሞ  ብቐዳምነት  ናይ  ውሽጢ  ዕዳጋ  ጠለብ  ኣማሊእኻ  ፍርያት 

ኢንዱስትሪ ንደገ ንሰደሉን ናይ ወፃኢ ሸርፊ እናረኸብና ከም ካልኦት ሃገራት 

ሃገርና’ውን  ናብ  ዝለዓለ  ኩለመዳያዊ  ዕቤት  ትበፅሓሉ  ኩነታት  ምፍጣር  ዝብል 

እዩ። 

እዚ ኣብ ተግባራውነቱ እንትረአ ድማ ኣብ ክልላት ዘሎ ፍልልይ ተፈጥሮ 

ሃፍቲን  ፀጋታትን  ንዕኡ  ንምቕያር  ዘኽእል  ውሽጣዊ  ዓቕሚ  ኣብ  ሓረስታይና 

ስለ ዘየሎን እቶም ቀንዲ ምኽንያታት ኮይኖም ምስኡ ‘ውን ድኹም ኣፈፃፅማ 

ፀገም ውሕሉል መሪሕነት ስለ ዘሎን እዩ። 

ከም  ዝፍለጥ  እቲ  ፖሊሲ  ብሃገር  ደረጃ  ምስ  ወፀ  ብዘይ  ኣፈላላይ  ናብ 

ክልላት ወሪዱ ክትግበር ተፈቲኑ ሐዚ’ውን ይቕፅል ኣሎ። ትግራይ ካብ ደርግ 

ሓራ ካብ ትወፅእ ኣትሒዙ ብመንግስትን፣ ማረትን ገለ ገበርቲ ሰናይ ትካላትን 

ብምትሕብባር  ኣብዚ  ፖሊሲ  መሰረት  ዝገብሩ  ዘፍረዩን  ዘየፍረዩን  ብዙሓት 

ፃዕሪታት  ተገይሮም  እዮም።  ንኣብነት  ማእቶቱ  ሕርሻ  ንምድንፍዕ  ዓሊሙ 

ስራሕቲ  ዕቀባ  ሓመድን  ማይን፣  ልምዓትን  ክንክንን  ሃፍቲ  ተፈጥሮን፣  ንሕርሻ 

ዝኸውን  መሬት  ምስፋሕ፣  ልምዓት  መስኖን፣  ኣማራፅታት  ማይ፣  ምርባሕ 

ቀወምቲ  ተኽልታትን፣  ምህጣር  እንስሳን  ወዘተ  ብምሕሳብ  መደባት  ወፂኦም 

ንምስራሕ ተፈቲኑ እዩ።